Strilalam

Kortreist kvalitetslam på dugnad

Då mobilslakt kom på banen, starta seks sauebønder eige produksjonsselskap. Med samarbeid og dyrevelferd i alle ledd, har dei skapt unike kvalitetsprodukt.

Evelyn Sommer er dagleg leiar i produksjonsverksemda, som i dag ber namnet Strilalam. Ho fortel om ei skikkeleg suksesshistorie.

– Vi vart nyfikne på å prøve mobilslakt då det siste slakteriet i Hordaland vart lagt ned. Det fyrste året, 2006, slakta vi 50 dyr, og sidan har det berre balla på seg. I 2009 hadde etterspørselen vorte så stor at vi måtte avgjera om vi verkeleg ville satse. Dermed bygde vi eige produksjonslokale og gardsbutikk på Algrøy, fortel Sommer.

Stressfritt

– Ved å slakte dei heime unngår vi i tillegg lang transport og oppstalling i ukjent miljø, med det stress det påfører dyret. Vi modnar produktet på den gamle måten, ved å la dyrekroppen hengje i kjølerom med låg temperatur før den blir delt opp. Då får vi fram eit smakfullt produkt som smeltar i munnen, utdjupar Sommer.

Resultatet er fenalår, spekepølse, pinnekjøt og mykje anna godt, samt flotte lammeskinn. Butikken på Algrøy er open kvar laurdag, og kvar dag i høgsesongen om hausten. Produkta kan òg lagast på bestilling.